Айсен Николаев Ленскэйгэ сырытта

SAKHAPRESS Бэҕэһээ Ил Дархан э.т. Айсен Николаев Ленскэй оройуонугар сырытта. Санатан эттэххэ, Ленскэй оройуонугар “Сибиир күүһэ” диэн ааттаммыт баараҕай бырайыак тутулла сылдьар. Ону сэргэ быйыл Ленскэй куорат төрүттэммитэ 275 сыллаах үбүлүөйүн бэлиэтиир.

Айсен Николаев куорат үбүлүөйдээх тэрээһинигэр: “Ленскэй Саха сиригэр, Уһук Илин эрэгийиэннэргэ эрэ буолбакка, бүтүн Россияҕа биир бастыҥ экономикалаах оройуон буолан эрэр. Аҕыйах хонуктааҕыта РФ бэрэсидьиэнин Владимир Путины кытары көрүстүм. Саха сирин араас бырайыагын туһунан кэпсэттибит. Ол иһигэр Саха сирин арҕаа оройуоннарын, чуолаан Ленскэй оройуонун сайдыытын, туһунан. Билигин манна “Сибиир күүһэ” аан дойду таһымнаах барыйыакпыт тутулла сылдьар”, -- диэн иһитиннэрдэ. Уонна манна сыһыаран, бу бырайыакка оройуон олохтоохторо бары кэриэтэ кыттыһыахтаахтарын эттэ.

Ил Дархан эбээһинэһин толорооччу бэлиэтииринэн, Саха сиригэр ньиэп уонна гаас промышленноһын сайдыыта дойду экономикатыгар улахан оруоллаах. Ол барыта нэһилиэнньэ олоҕун тупсарыыга туһуланыахтаах. Айсен Николаев Ленскэйгэ сырыытын кэмигэр “Таас-Юрях Нефтегазодобыча” хампаанньа салалтатын кытары көрүстэ.

“Хампаанньа үчүгэй көрдөрүүлээх иһэр. Кэнники ыйдарга хампаанньа өрөспүүбүлүкэ уонна муниципальнай тэриллиилэр бүддьүөттэригэр нолуок быһыытынан угар төлөбүрэ уларыйда. Ол эрээри биһиги улахан хампаанньалары дохуоту эрэ ылар сир курдук көрүө суохтаахпыт. Мин санаабар, бу сыыһа өйдөбүл. Биһиги хампаанньаҕа олохтоохтор төһө үлэлии киирэллэрин, хампаанньа бэдэрээттэһэн үлэлиир тэрилтэтэ төһө элбэҕин көрүөхтээхпит. Оччоҕо эрэ биһиги хардарыта үлэлэһиини ситиһиэхпит”, -- диэн бэлиэтиир Айсен Сергеевич.

Бу сайын Айсен Николаев Ленскэйгэ сырыттаҕына, хаарбах дьиэттэн дьону көһөрүү барыгарааматынан тутулла турар икки дьиэҕэ үлэ ситэтэ суоҕа көстүбүтэ. Олохтоохтор тутааччы тэрилтэлэр үлэлэрин ситэри оҥорбокко сылдьалларын эппиттэрэ. Айсен Николаев кинилэри кытары көрсөн, үлэ-хамнас хайдах баран иһэрин көрдө. Билигин “Монолистрой” тэрилтэ дьиэ таһын аспааллаан бүтэрбит. Оттон “Сахастроймонтаж” кыбартыыралар истэрин оҥорбут, билигин дьиэ таһын оҥоро сылдьар. Айсен Николаев уонча күн иһинэн үлэ барыта ситэриллиэхтээҕин, икки нэдиэлэнэн өссө бэрэбиэркэ кэлиэҕин туһунан иһитиннэрдэ.

Аграфена КУЗЬМИНА