Саҥа 2020 сылга бастакы быыбар түмүктэннэ. “БИИР НЬЫГЫЛ АРАССЫЫЙА” баартыйа кыайда

SAKHAPRESS Кулун тутар 1 күнүгэр Мииринэй улууһун “Ботуобуйа нэһилиэгэ” МТ олохтоох Сэбиэтин депуттарын талыы буолбута.

Урут олохтоох Сэбиэккэ 7 эрэ депутат мандаата баара. Ол онтон боломуочуйаларын болдьоҕо ааһа илигинэ үс депутат сайабылыанньа суруйан тахсан барбыттара. Былырыын кворум туолбат туруга суоһаабытынан ситимнээн, суут депутаттар олохтоох мунньахтарын ыһарга уураахтаабыта. Сыл кэриҥэ нэһилиэк депутаттара суох олорбута, уонна дьэ болдьох иннинээҕи быыбар саҥа ыытылынна.

Бу сырыыга мандаат ахсаана биллэ элбээбит – 15 буолбут. Быыбарга 32 кандидат турбут. Кинилэртэн 12 киһи “БИИР НЬЫГЫЛ АРАССЫЫЙА” баартыйаттан, 3 кандидат – КПРФ, 17 кандидат – бэйэтэ туруоруммут.

Таас-Үрэх сэлиэнньэтигэр 422 куоластааччы баар. Онтон суоттаан таһаардахха, биир кандидатка 13 куоластааччы буолар.

“Бу кэмнэргэ нэһилиэк бүттүүнэ быыбарынан тыынан олорбута. Олохтоохтор олус көхтөөхтүк бэйэлэрин кандидатураларын туруоруммуттара. Хас биирдиилэрэ улахан эппиэтинэһи сүгэрин, нэһилиэк социальнай-экономическэй сайдыытын туһугар үлэлиэм диэн чахчы өйдөөн туран кыттыыны ылбыттара. Мандаат ахсаанын улаатыннарбыппыт – сөптөөх быһаарыныы, баҕалаах дьон олус элбэх, уонна нэһилиэкпит сайдыытыгар туруорсуулар күүһүрүөхтэригэр эрэнэбин, - диэн Зоя Данилова, “Ботуобуйа нэһилиэгэ” МТ баһылыга иһитиннэрбитэ, – Таас-Үрэх олохтоохторо быыбарга олус көхтөөх кыттыыны ылбыттарын иһин махталбын биллэрэрбин. Уопсайа 60,43% киһи куоластааһыҥҥа кыттыбыта”.

Быыбар түмүгүнэн “БИИР НЬЫГЫЛ АРАССЫЫЙА” баартыйаттан 8 кандидат кыайбыта, онтон хаалбыт 7 мандааты бэйэтэ туруоруммут кандидаттар ылбыттара.

“Бу сылга бастакы быыбар биһиги баартыйаҕа үчүгэй көрдөрүүлээх буолла. “БИИР НЬЫГЫЛ АРАССЫЫЙА” баартыйаттан турбут дьон кыайыылаах тахсыбыттара элбэҕи этэр – бу аата Таас-Үрэххэ биһиги баартыйабыт аптарытыата сүҥкэн эбит. Мииринэйдээҕи олохтоох отделениебытыгар быыбар хампаанньатын бэркэ тэрийбиттэрин иһин махталбын тиэрдэбин”, – диэн Владимир Аммосов, “БИИР НЬЫГЫЛ АРАССЫЫЙА” баартыйа Саха Сиринээҕи отделениятын исполкомун салайааччыта, санаатын үллэстибитэ.